كنت اليوم فى المرور لتجديد رخصة السيارة وذهبت كالعادة لوحدة مرور الاميرية التابعة لها السيارة وعندما اردت استخراج شهادة مخالفات وجدت الموظفة تعطينى ورقة برقم السيارة القديم التابع لمرور السلام وتقول لى بمنتهى البرود هات لنا شهادة مخالفات من مرور السلام على هذة النمر طبعا حاولت جاهدا ان افهم منها اية السبب مع اننى سلمت النمر القديمة مع شهادة مخالفات لمرور الاميرية من سنة ونصف تقريبا وعلى اساسة استلمت نمر جديدة وتم وقتها الترخيص للسيارة يعنى بالبلدى كدة المرور اعترف من سنة ونصف ان السيارة مفيش عليها مخالفات ودلوقتى رجعوا فى كلامهم ولما حاولت استفسر من الموظفة طبعا ظهر عليها العبوس ومدت بوذ من هنا لاسيوط وهيا بتقولى باعلى صوت هو دا القانون لازم تجيب كل سنة ولمدة ثلاث سنوات شهادة مخالفات من المرور التابعة لة النمر القديمة واحنا بنطبقة وملناش دعوة عاوز تجدد هات مخالفات من السلام وبعديين نديك احنا شهادة مخالفات من عندنا مش عاوز تجدد انت حر -- طبعا اخذت ورقة النمر القديمة وانسحبت بهدوء الى مرور السلام وما ادراك ما السلام بجد ربنا يبعدكوا عن سكة مرور السلام - اربع ساعات يا مؤمنين علشان اجيب شهادة مخالفات - لا واية اسمعوا الحكاية دى بجد مش عارف اضحك والا ابكى اسمعوا واحكموا انتم - ذهبت من مرور الاميرية الى مرور السلام فى تمام الساعة الثانية عشرة ظهرا واعطيت الموظف المسئول الرخصة والورقة الموجهة من مرور الاميرية الى مرور السلام المهم الراجل ذوق جدا واستلم الاوراق بصدر رحب وقال لى اتفضل اقعد لحد ما ننادى عليك بصراحة انا استبشرت خير بوجهه السمح- المهم بعد ساعة بالتمام والكمال نادى الموظف البشوش اسمى قلت جة الفرج واذا بة يقابلنى بنفس الابتسامة و يطلب منى صورة البطاقة فقط واتفضل اقعد هننادى عليك يا باشا وبعد نصف ساعة اخرى ينادى اسمى تانى وبنفس الابتسامة الرقم اللى فى الورقة دة غلط يا استاذ ارجع لمرور الاميرية وخليهم يصلحوة لك قلت لة غلط ازاى قام الموظف البشوش قالى زايد رقم السبعة دى زيادة ركز معايا قال السبعة دى زيادة - قلت لة النمر القديمة بتتكون من كام رقم- قام متبرع من الناس اللى حول الشباك قال بيبقوا ستة ارقام - قلت لة اتحلت عدهم بقى قالى وهو يخفى الكسوف طيب اتفضل اقعد هبعتوا للمراجعة و هننادى عليك - اوعوا تكونوا زهقتوا لسة بدرى- طيب ياسيدى نستنى وامرنا لله وبعد ساعة اخرى من الانتظار الممل ينادى الموظف المبتسم على اسمى لتالت مرة اعتقد ان كل من فى المرور اكيد حفظوا اسمى عن ظهر قلب - يا استاذ الرقم الاخير دة مش واضح هو دة سبعة والا ثلاثة مع انة المرة اللى فاتت نطقة لو تفتكروا سبعة والرقم والله واضح يا ناس سبعة والله العظيم لو جبت طفل عندة سنتيين هيقولك دة اكيد سبعة - المهم قلت لة والله سبعة والناس المتبرعة حول الشباك يحلفون لة انة سبعة ووحيات الاخوة وعليا الطلاق ورحمة زوج خالتك الرقم دة سبعة وهو بيقول لازم تروح لمرور الاميرية يوضحوا الرقم ويختمولك علية انة سبعة دة كلة لمصلحتك يا باشا بدل ما تدفع مخالفات حد تانى - لما فاض بى الكيل قلت لة انت عامل مشكلة لية هى سبعة وانا بحب ادفع مخالفات غيرى يا سيدى خلصنى بقى دى ما كنتش شهادة مخالفات - قالى براحتك انت حر يمكن فلوسك كتير - ثم بعدها عاد ليبتسم ويقول اتفضل ------ --- قلت لة عارف اقعد هننادى عليك -- والمرة دى فاتت ربع ساعة واسمى للمرة الرابعة يدوى فى سماء المرور - والموظف السعيد يبلغنى بقيمة المخالفات والحمد لله ثلاثون جنيها لا غير قلت كويس وقبل ان امد يدى لاعطية المبلغ قال روح ادفع فى الخزينة قلت ومالة المهم دفعت المبلغ المفروض بقى استلم الوصل واذهب الى حال سبيلى - لكن الجملة المستفزة اياها تقولها الموظفة على الخزنة اتفضل ------------ طبعا روحت قعدت من غير كلام - وبعد ساعة اخرى من الملل ينادى الموظف الضاحك اسمى للمرة الخامسة والاخيرة ليسلمنى شهادة المخالفات بعد عناء دام قرابة اربعة ساعات داخل مرور السلام ومع الموظف البشوش اللى كان عاوز يرجعنى لمرور الاميرية وخلاص مش عارف لية -- طبعا اليوم خلص فى مرور السلام ولسة بكرة لازم اروح تانى علشان اكمل باقى التجديد --- اسف للاطالة بس حبيت اوريكم قانون العصر الجاهلى اللى احنا عايشين فية مع كل هذا التطور لا توجد شبكة تربط ادارات المرور ببعضها - حتى لو النمر القديمة عليها مخالفات ممكن جدا تضاف على مخالفات النمر الجديدة وتدفع كلها فى مكان واحد وهو ادارة المرور التابعة لها رخصة السيارة -- انما نقول اية حسبنا الله ونعم الوكيل ------------!
ليست هناك تعليقات:
إرسال تعليق